14 قلم بزنميش آي
ملیحه عزیز پور
...
گونش
ایستی چورک دیر
یاپیلیر هر گون
دونیا داکی
آج اوشاقلار
ساغلیغینا...
...
گوزه ل لیگی
کیر ایچیندن بویلانیر.
هر کس،
اوزونو چئویریب کئچیر
زیبیلچینین یانیندان...
...
یاغیش یاغیر!
شهر سئوینجک.
خیاوان- کوچه
آغاجلار- سئرچه لر بئله سئوینجک.
***
"خیردا خانیمین٭"
ائوی دامیر...
٭اؤزه ل آد
قارتال،
قفس آرخاسیندان باخیر
هاوادا اوچوشان
میلچکلره...
...
بیر کیشی نی
باغیرساغی ایله آسیب لار!
دئییرلر:
"بیر گئجه لیک چورک
اوغورلامیشدی"...
...
بارماقلارینی کسدیلر
اؤلدو شاعیر...
اوریینده قالمیشدی
سؤزلری...
...
اونون اؤچون
هر شئی سونا چاتمیشدی .
***
بیر تیکه بولوت واریدی
گؤی اوزونده...
او بیر بایقوش بسله ییر قفسده.
گئجه - گوندوز
اونا بانلاسین دئیه!
گئجه اوره کلی لیییندن می؟
قنارییه نفرتیندن می؟
یوخسا؟!!
...
مین اوچ یوز سئکسن دؤردونجو
گونش ایلی.
منیم
یالنیز اییرمی بئش یاشیم وار
تانریم!
بس منیم قالانیم هانی؟!
حقیقتی خبرآلدیم
دئدیلر:
"او قادین دوغاجاق!"
قادینا گئدینجه
گوردوم
اوشاغینی دوشوروب...
...
ان سئودیییم خبر: گونش
ان سئودیییم کدر: سئوگی
ان سئودیییم شهر: وطن
ان سئودییم کیشی: شعر
...
***
هه!
دوغروسویله ییرلر
من لکیته یم
دونیا نین ان تمیز لکیته سی...
...
هله ده گووه نیله جک
بو یارادیجیلیغا!
اییرمینجی عصرین اوزه ل صنعتی
اینسانین اؤز ، ال صنعتی!
"آلقیشلار..."
***
"آتم بمباسی..."
آغ دریلی لر
قارا دریلی لر
ساری دریلی لر
قیزیل دریلی لر...
***
یئنی بیر سوی آرتماقدادیر
اینسا نین رنگسیز لییینه...
گؤی گؤز تانری
ملیحه عزیزپور
1
ابدی گئرچکلیکدیر
گؤزلرینین
ماویلییی...
نه توستولو دوروشوغو وار
بو شهرین!
سانکی
اؤلومه
معتاددیر...
" اینسان حاقلاری "
دئیر کن
" دیلیم "
یارالی قوش کیمی
چیرپیندی...
آچیلسا کؤنلومون
کور دویونلری
بیر کؤینک توخویاجام
وطن اینینه...
نه جمدک یئمیشدیم
نه قان ایچمیشدیم!
...
دیشیم قانامیشدی...
سنی سئویره م" N ".
بیریسی
تووالت دوواریندا
یازمیشدی...
آه !
گئجه اوزلوم
آفریقا چیچه ییم!
آغ ایشکنجه لریمیز بیتسیدی
قارا دردلریمیزی دوسونردیک
بیر آزدا...
بیر کیتابدا اوخوموشدو:
" قاچماق هر زامان ایشه یاراماز
زامانیندا دایانماق گرک! "
دایاندی.
قاچانلار
ووروب ییخدیلار...
بیر آز گؤز یاشی
بیر آز اومود
بیر آز آغری
بیر آز دؤزوم
بیر آز...
بیر آز...
بیر آزدا...
* * *
قادین.
بوتون یوللاری قاپادیلار.
سلامیم ،
سنه چاتماسین
دئیه !
11
بیر- بیرلرینی سئومک
اله گلمز آرزولاری ایدی!
* * *
بلک ده ایکن
آد اولموشدولار
عمی قیزی ایله عمی اوغلو...
توسباغانین
ائوی چالینینجا
اؤلدو...
" قورخاق قادینلاردان نفرت ائده ره م "
دئییردی.
تومان آلتیندا گیزله نن
کیشی...
قارا گونلری اینینده ،
یول قیراغیندا اوتوروب.
سازاق،
بیر قوجاق خزل تؤکور
دیلنچینین آووجونا...
نئچه " دماوند " گرکدیر
قووزانیب زیروه نه باخماغا؟!
سئویملی
"ساوالان... "!
گؤیرچینلر سیغناجاغی...
یوواسیز قوشلار اوجاغی...
سلام" ارک "!
سنی،
سئوه بیلمیره م
اونو،
سئومه یه بیلمه دیییم کیمی...
اوزاقدان باخاندا:
بیر قوجا حکیمدیر
ایله شیب، فیکیره دالیب.
یاخینلاشاندا:
عئینالی کورکلی
سهند کورکلی
شاه گؤلو ببکلی، ا یگید دیر
شهریم!
مئیوه لر،
عوصیانا قالخمیشدیلار
آغاجلارا قارشی!
تکرار اولایلاردان بئز میشدیلر...
گؤزلرین
" خان اصلی " دیر
اوره ییم
" یانیق کرمی "...
بیزیم محلله نین قیزلاری
چؤرک قوخویور
اوغلانلاری
سیقارا...
" فضولی " دیوانی دیر
" نسیمی " شعری دیر
" نباتی " غزلی دیر
گؤزلرین...
اوچ دؤنه بوشامیشدی اونو...
دونیا !
آما یئنه
قوینوندا یاشاییردی
گوناهکار قادین...
اؤلو- وای ، یاشایاردی
دیری ایکن
تابوتدا داشینان اؤلو...
گؤزون گیل گلنده بیزه
خبر وئر!
گوللره دئییم آچسین...